Haddan tashqari bog‘lanib qolish — bu kasallikmi?
Psixologiyada insonning boshqa bir insonga haddan tashqari bog‘lanib qolishi har doim ham kasallik hisoblanmaydi. Ammo bu bog‘liqlik insonning hissiy holati, kundalik hayoti va o‘ziga bo‘lgan munosabatiga salbiy ta’sir ko‘rsata boshlasa, e’tibor talab qiladi.
Masalan, kimdir sizga har kuni yozishga odatlandi, keyin esa birdan kamroq yozadigan bo‘ldi. Siz esa uning xabarini kutib, telefoningizni qayta-qayta tekshirasiz, kayfiyatingiz tushadi va o‘zingizni keraksiz his qila boshlaysiz. Aslida, sizni qiynayotgan narsa faqat uning yo‘qligi emas, balki xotirjamligingizni uning e’tiboriga bog‘lab qo‘yganingiz ham bo‘lishi mumkin.
Bunday bog‘liqlik ortida yolg‘izlikdan qo‘rqish, tashlab ketilish xavotiri yoki o‘z qadrini boshqalarning munosabati orqali baholash kabi omillar turishi mumkin.
Eng muhim jihati: yaqinlik va qaramlik bir xil narsa emas. Yaqinlikda inson boshqa birovni qadrlaydi, qaramlikda esa uni yo‘qotish qo‘rquvi o‘zligini yo‘qotish darajasiga yetishi mumkin.
Ba’zan insonni qo‘yib yuborish qiyinligining sababi uni juda qattiq sevish emas, balki usiz o‘zini qanday his qilishni bilmasligidir.
O‘zingizga savol bering: men bu insonni hayotimda borligi uchun qadrlayapmanmi yoki u bo‘lmasa, o‘zimni hech kimdek his qilamanmi?